Işkun Odı Yüregümde (Yunus Emre)
Işkun odı yüregümde neler eyler neler eyler
Bugün bir ‘âşıkı gördüm bu derdümden haber söyler
Gelün hey dertlüler gelün bu derdümden siz de alun
Dertlü bilür dertlü hâlin ya dertsüzler bunda n'eyler
Kimisi dost yüzin gördi kimi dahı görem dirdi
‘Âşık ma'şûkına irdi uş yine bayram eyler
Bugün Mansûr olup n'idem şeyhümün yüzini görem
Maksûdum buyıdı irem ‘âşık yine derdin söyler
Yûnus eydür ‘âşık oldum ma'şûkun derdinden öldüm
Teveccüh ma'şûka kıldum anunıla gönlin egler
Yorumlar
Yorum Gönder